نه زوره  اگیبدیر باشینی نه زره تبریز
نه سالداتا نه شاهلارا نه قیصره  تبریز

قات قات قالانیب داغ کیمی داغلار اوره گینده
قویموش وطن اوغروندا جانین مین  کره تبریز

هر نه یازام  آزدیر  سنین   آزاده   لیگینده ن
قارشیندا   اولان ای  اوجا   داغلار دره تبریز

هرکیم  کی  ائدیب  صفحه ی  تاریخی  تورق
حیرتده  قالیب   سنده  کی کر  و فره  تبریز

کوکسونده  بیتیب   لاله  قلیج لار  یاراسیندان
اوخشار  اوره گین   پارچالانان  پیکره تبریز

اوندا بیلینر   کی   نه   چکیبدیر   گئچه جکده
بیرگون قراراولسا  اوره گین   گوستره  تبریز

تهراندا   سونن   وقتیده    مشروطه   چراغی
ووردو   علم    نصرتی    بام   و   دره  تبریز

کیم ایستدی  دینسین  دیلینی  کسدیلر ،  اولدو
خالقین   بوغولان      فریادینا    حنجره تبریز

داغ تک    دایانار     حادثه لرده   آیاق اوسته
اگمز باشینی    مهتره  نه   کهتره  تبریز

بیر   آیری  حماسه     یارادیب   بهمن  آئیندا
ثبت ائتمیش   آدین    عز تلن    دفتره    تبریز

اول گون کی بوتون اولکه نی ظلمت بوروموشدی
کیم  آچدی   ایشیقلیقلارا   بیر   پنجره!: تبریز

بیر آندا  ( تجلا ) ائله دی     غیرتی ، وقری
ظالیم  پاشانین  ائتدی  ایشین  یکسره    تبریز

باخ  همته   سن  سگیز  ایل  اسلام قوشونوندا
هم  میمنه   تبریزی دی    هم     میسره تبریز

اصلانلارینی      جبهه لره      ائتدی   روانه
ایز  قویدو   قیزیل   قانیلا  هر سنگره   تبریز

اووه لدی       شجاعتده    رشاد تده     ادبده
واردیر   یئری  فخر ایله سه گر ائللره تبریز

تک   آذری لر  یوخ  بوتون  ائللر    گوه نرلر
عاشورا   گونونده ن    آد آلان   لشگره تبریز

محراب   عبادتده    اولان   باش     وطنیمده
قاضی مدنی      فدیه وئره ن   حیدره تبریز

اول  دوشمن  نادانه    دئه : بیهوده چالیشما
لبیک   دئیب   روز    ازل     رهبره تبریز